"الجزء الرابع"
"في المستشفى"
في المستشفى... العصر... الكل كان مجتمع في غرفة عبدالله .......امه قاعده عداله وكل اشوى اتاكله شى من الى يايبته ...والباقين كانوا ...يسمعون سوالف سيف الى ما اتخلص ..حميد و راشد ميتين من الضحك على سيف ..وكيف يقلد ...اشوى ودخل محمد معاه امه واخته افنان..وعاليه وغاليه.....ما كانت بتيبهم بس سولها مناحه يبون يروحون ....
ام محمد : السلام عليكم والرحمه ..
الكل : وعليكم السلام...
ام محمد : شخبارك ولدي عبدالله الحين ..انشاالله اهون ...يبوك خرعتنا عليييك ...
عبدالله : هلاااا خالووا ام محمد انا الحمدالله بخير الحين ...مافيني شى ...لا اتحااتي
محمد : هييييييه مااافيك شى ...(ويقعد عداله بعد ما سلم على ام راشد ووايه سيف وحميد وراشد)..حراام عليك جاان جي اتزيغنااا ..
عبدالله: هههههههههههه ..يالله عليييك انته قلنا ما فيني الا العاافيه حق شو الزياغ بعد ...(كان يحاول ما يبين لهم انه متضايق وتعبان ومنقهر من داخله ..كان يضحك ويسولف علشان لا يحسون.... بس شخص واحد كان حاس فيه...سيف..)
غاليه : عبوووووود عنلااتك ...حق شو قاعد وامسوى نفسك ملك ..تقص علينا تقول مريض ...قوم اشوف قوم ...يالعياار ..
قعدوا الكل يضحكون عليهااا ..وامهااا عطتها ابعيين علشان تسكت ....
عبدالله : اانتي من وين طلعتيلي يالمفعوصه ... هيييه ياا عاليه والله كبرتي وطلع لج اللسان بعد ...
عاليه : (كانت قاعده مع خلود وافنان ولما سمعته يقول جي اطالعته )...انااااا ليش شووقلت ...؟؟...
عبدالله : اوووووه يبوج نسيناااااا ان غلوي اهي الى ام اللسان طويله ....زيييين اقولج خالوه جان حطيتوا علامه على وحده فيكم علشان نقدر نفرق بينكم ....
ام محمد : هيييه والله صدقت ...بقص اللسان غلوي ..علشان اتفرقون بينهم ...
سيف : كيف ماا اتفرق بينهم ..اصلا فرق السما عن الارض ....غلوي السانها اتشوفه قبلها ...يلعلع ... هههههههههه ..اما علايه ...حليلها اطيب عنها ما بتحصلون...(كان قاصد يقول هالكلام علشان يشوف اخدود عاليه يحمرن ..)
غاليه : لاااااا والله احلف انته بس .....ومنو قالك اصلا اني ابي اشبهاااا ...من زينهاا اهي يعني...قول بس علشان مسمينها على امك ..
سيف : اصلااا احمدي ربج يوم تشبهين علايه ...(وقعد يطالع عاليه ).. حليلهاا ام الزيييين ...مب انتي ام اللسانين مع هالويه ...
استحت عاليه واحمرن اخدودها من كلام سيف .....والكل قعد يضحك على سيف وغاليه واهمااا يتناقرون وكل واحد يحط على الثاني....لكن حميد ..طول الوقت كان يطالع افنان ...يبي يعتذر لها ..بس ماا يقدر يكلمها والكل قاعد ....بس قال ما شى فرصه الحين ..راشد طلع وخذ خواته وبنات عمه معاها ..يوديهم البيت ..اما حميد ومحمد اندمجوا بالسوالف مع بعض... بعد ما قامت ام راشد وراحت قعدت تحت على الارض مع ام محمد يسولفون ...وكان الكل ملتهي ..قام سيف وقعد يم عبدالله في السرير ملاصقنه ...
عبدالله: ..نعم ...نعم ..خير ....قوم اقعد في حضني احس بعد ....(وكان يحاول يدزه عنه لكن سيف حاط ايده على كتف عبدالله ويحضنه ) ...سواااااف ..يالطفس ههههههههههه ..قوم عني ..خنقتني شووفيك هالكثر حب ..
سيف : حبك برص من زيينك علشان احبك ....مالت علييك ..احمد ربك قااعد اعطييك حنااان ..يحصلك انته تاخذ حنان من عند سوااف ...
عبدالله : لااا ماا يحصلي ..زييييين فج عني شوى ابي هوااا ...يالله قووووم..
سيف : مممممم ..(يهمس حق عبدالله ).... عبدالله ...البارح لما رجعنا البيت ..تذكرت اني لما شفتك طايح كنت ماسك تلفون بإيدك ..قمت واتصلت باخر رقم وطلعت لي بنت ..والظاهر انها اتعرفك ..كانت اتصيح .....
عبدالله : شووو ....ليكون خبرت احد ...؟؟..
سيف : لااا تطمن ما قلت حق احد ...بس ..انا حاس انها السبب بالي سويته بنفسك ...صح؟؟..
عبدالله : ...........
سيف : دام انك سكت يعني كلامي صح ....بس والله ما كنت اتوقع منك هالشى ...المهم لا اتحااتي انا ما بخبر احد على الى صار ..بس ابيك تدير بالك على نفسك عدل ياا اخوى ..
عبدالله : لا اتخاااف على ...مشكور يا سيف ....
سيف : لااا شكر على واجب انته اخوى الكبير ..
حميد و محمد ...استغربوا انه سيف قاعد يتكلم مع عبدالله ...غريبه اهمااا ما كانوا يشوفون بعض ولا يقعدون مع بعض واايد ...شو هالشى الى بينهم ...طالع حميد سيف وعبدالله وقام يقعد عندهم اهو ومحمد ...
حميد : سوااااف ..يالخااااااااين ..الحييين صار بينك وبين عبدالله اسرار ..الله يالدنيا نسينا ماا كلينا ....لكن ما اقول غير الله كريم ( وقعد يمسح عيونه بسفرته ويسوى نفسه يصيح )...
سيف : هههههههههههههههه ...الله ياخذ ابليسك ..شو بعد اسرار ...انا الا قاعد اسولف معاه اسليه ..مب انته قاعد لي مع القلب واتسولفون جنكم حرييم ..
قام محمد وضرب سيف ...وسحبه من كندورته وقومه من السرير ..وسيف بيمووت من الضحك عليه ...
محمد : قووم ..قووم اشووف...شو بعد هالرمسه ..اشوفك اختربت انته ...صاير لي خريشه مع هالويه ....قوم مناك اشووف ..
ام محمد : حموود ..خل ولد عمك شوو اتسوي فيه جي ....مب زيين عليك بتذبحه ...
حميد : خله يذبحه يستاااهل ...رمسته صاايره مب شى هالاياام ...مب منه من الى يرابعهم ...(ويقوم ويمسك سيف ..ويعاون محمد على ضربه بهدلووه)..
عبدالله : ههههههههههههه ..حرااام عليييكم شووسويتوا فيه ...بسه بهدلتووه مب زيين جي
سيف : ههههههههههههههههه ...وااااااااااي ذبحني امااايه ....شووفيه ......بمووووووت هههههههههههههه ...فج ايدك عني خنقتني....(محمد كان ماسكه من صوب ..وحميد بعد مااسكه وشايل انعااله بإيده ويضرب سيف فيها )....هههههههههه ..دخيييلكم خلااص التووبه ..ما اقول هالرمسه مره ثانيه...(قاموا عنه وفروا تحت واهوو بيمووت من الضحك عليهم )...
ام راشد : بسم الله عليييييك ولدي تعاال ....حمييد عنلااتك انت ومحمد ..خلووا ولدي ذبحتووا .....
حميد : هيه دلوووووع ماما ...روح عندهاااا ....على شو اتدلعك ماا ادري من زييينك ...مع هاالويه ..
سيف : يالغيووووووور انته الحيييين كل هالضرب علشاان امايه تحبني اكثر منك ....هيه قول جي من زماان ..قول انك حااقد على ....
عبدالله : لييش واانا طلعت من الحسبه يعني ...انا بعد امي كانت اتدلعني وااايد ..بس من يوم ياا هالدب ماا قمناا نشووف اى حنااان ..خذاه عنااا ..خذا الله روح عدويينه انشاءالله (يمسك المخده ويفرها على سيف) ..
سيف : ههههههههههههههه والخييييييييييييييييييييييييبه هالكثر حقد ...اماااااايه دخييلج لا اتخليني بروحي اخااف يذبحوني عيالج ...
عبدالله : اقوول اماااااااايه ..طلعي اعيالج ..من اهني ..رفعوا لي الضغط ..ابي ارقد ..حشروني ...
ام محمد: يالله انته ويااااااه قوموا اطلعوا برااا ..خلصت الزيااره ....
ام راشد : حمييد ..خذ اخووك وولد عمك ورووحوا اسرحووا في اي مكان ..خلوا اخوكم يرتااح حليله ميهوود ...يالله قوموا ..وبعدين لا تنسوا ترجعون حقنا اتودونا البيت..
عبدالله : ههههههه ..اوووه اطروودهم ...يالله عطوني مقفاكم يالله ابسرعه ..
حميد : والله مب منك من الى يزورك ولا انت ويه احد ايي عندك ....يالله محمد قوم سريناااا ..
سيف : هههههههههه تستاهلوا من حشرتكم كله منكم اطردونااا ....
وقاموااا ...حميد ومحمد ..بيروحون ..وسيف يمشى وراهم ....
حميد: نعم ..نعم اخوى وين تبي ياي وراناا ...
سيف : شوو بعد وييين ...وصلوني بطريجكم .....
محمد : شوووو ..عييد مره ثانيه ماااا سمعتك ....شووف التكاسي ما اتقول شى اطلب لك تكسي وروح معااه ...يالله حميد ...خل اللسانه ينفعه ....
حميد : هههههههههههه ..باي سيف نلتقي بالبيت ...
سيف : زيييييييين ما عليه مردوده ...الله كريييييم .....
رضى سيف بالأمر الوااقع وقام وطلب له تكسي وراح عند ارفيجه علي بعد ما اتصل فيه وقاله انه يبيه في شغله ضروريه....
"في بيت ابو راشد"
بعد اسبوع من الى الصار حق عبدالله ...الكل نسا السالفه ولا كانه شى صار.. حميد كان قاعد في الغرفه وكل الى في باله افنان ..مب قادر يشيلها من باله ...شو الى خلاها اتصيح ..ما كان يدري ...اهو كان متعود يتغشمر معاها بس ليش هالمره زعلت منه ماااقدر يعرف ...اكييد اخته خلود اتعرف ...علشان جي قام وبدل اثيابه وراح يدور عليها ..راح لها غرفتها و دق الباب ودخل......
حميد : السلام عليكم ..(كانت قاعده على السرير وتكتب ....يا وقعد عدالها)..
خلود: وعليكم السلام والرحمه ....هلااااا ب حمييد زارتنا البركه ...شو تبي شاي ..مااي غرض ...مرض ...؟؟.
حميد : خييييييييييييييييييبه اشوى اشوى على ماايسوى كل هذا علشان ييت الغرفه عندج...عاادي اختي ويااي اتطمن عليها فيها شى..(خذ ورقه من الى كانت تكتب فيهم وقعد يطالعها)..
حمييد : شووو هااا ....انتي من صجج تدرسين هالخبل ..؟؟...
خلود : ليش خبل عااادي ..بالعكس متعه ... ونااسه ....رووووووعه ..بل اكثر من رووعه ..
حميد : شوووو "بل" ....هذي البدايه ..هذا وانتي بعدج ما صرتي مدرسة عربي ..جي ..عيل ل وصرتي شو بيصير ...المهم من كم يوم اتصلت افنان فيج و...(حكى حقها السالفه كلها ) ....
خلود: والله وانت كيف تجرأت تقول حقها جي ..؟؟. حراام عليك ..
حميد : لا تقعديين اتسوين لي فلم هندي ....المهم ابيج اتكلميها وتساليها اذا تضايقة مني اوكيي..
خلود: وليش انت ما تسالها ...انت الى زعلتها اانا شو يخصني ...
حميد : عن الرمسه الزاايده سوى الى قلته لج ..بدوون اساله زااايده ..(قاام عنهاا وطلع من الغرفه)...
....عبدالله كان قاعد في غرفته على الكمبيوتر طبعا ....اشوى ويسمع دق على الباب ...قام وفتحه ...قعد يطالع ما شاف احد ...اشوى ويحس انه في احد ماسك ريله ..طالع تحت شاف ..."ريـــان " بنت اخوه راشد ...قام وشلها ودخلها معاه الغرفه ...قعد يلاعبها بعدين هدها بالغرفه تلعب والتها بالكمبوتر...
ريان: عمي ....
عبدالله : هلااا حبيبتي ..شوتبي ..
ريان: منو هذي ..؟؟؟
كاانت شايله في ايدهاا صورة وحده ...لقتها في الدرج الى يم اسريره ....
عبدالله : وينهاااا ...(قعد يطالعها بس ما لحق يا خذها من ايدها ) ..وين لقيتيها ؟؟...هاااتييهاااا ..
ريان : مااااابي ..بوديها حق بابا ..(خذتها وركضت وطلعت عنه من الغرفه)..
عبدالله : ريااااااااااااااااان ....رياااااانووووووو ..تعااالي اهنيييي ..يبي الصوره ....
عبدالله كان اثر التعب بعده باين عليه ماااكان قادر يركض وراهااا ..سبقته ونزلت من الدري ....لكن وقبل ماا يوصل حقهاا ..شاف شخص وااقف عند الدرى وشال ريان على كتفه .....وقف وقعد يطالع الشخص ....ظنكم منو الى طلع في ويه عبدالله ..
