السلام عليكم ورحمة الله وبركاته....
بسم الله الرحمن الرحيم.....
بحاول أكتب بالعاميه شوي لأني بديت أحس اني عايش في عصر المتنبي....
عمومآ الموضوع أو محور الحديث مب هذا....
بصراحه اليوم قريت رائعه من روائع الشعر ويمكن تكون من أجمل ما قرأت وشافت عيوني .... كلمات عذبه ومصادفه جميله اللي خلتني أقرأ هذي القصيده...
طبعآ عشان ما أهضم حق الريال اللي ساهم في هذي المصادفه بقول أسمه .....
الريال طبعآ وبدون أدنى شك واحد من أجمل الأعضاء والمسؤليين في هذا المنتدى الرائع.....
وأحب أشكره جزيل الشكر قبل لا أذكر أسمه لأنه بالفعل انسان رائع وذوقه أروع خصوصا بعد ما طرح هذه الرائعه الجميله من جديد....
الشخص هذا أسمه " مفتون العين " اللي عودنا دايما على كل جميل....
تعرفون ليش..... لأنه أسترجع قصيده يمكن كانت مدفونه في المنتدى الشعري فتره وصارلها قرابة السنه....
القصيده طبعا للشاعر الجميل والحلو والذوييق اللي محد يبخس حقه شاعرنا.....
" الخيال الشارد " ....
والقصيده هذي بعنوان " صدفة الخيال الشارد مع الخيال الشارد " .....
بالفعل رائعه من روائع الشعر ..... وحرام تكون موجوده في أرشيف أو في مكان بعيد في المنتدى....
وحرام أنا الواحد يقرأ مثل هذي القصيده ويتغنى بحلاوتها وينساها...
وحرام انا يدخلون زوار أو أعضاء يداد وما يقدرون يقرونها لمجرد أنهم لازم يدورون في المنتدى.....
فقلت في نفسي ليش ما نسويلنا " ديوان شعري للمنتدى " .....
يضم أجمل وأحلى القصائد الموجوده فيه من قصائد كتبها الأعضاء أم من قصائد شاركوبها الأعضاء.....
مب أفضل عن الحواطه في المنتدى كله والحفر حتى اعماقه عشان نطلع قصيده مثل هذي.....
يعني الديوان بيساعد الأنسان اللي بيدخل على قرائة أجمل القصايد فيه وبهذي الطريقه مافي داعي انا يتعب نفسه ولا أنتوا شو تقولون .....
وعلى فكره وقبل لا أنهي كلامي.....
بعد في قصيده أقسم انها روعه روعه روعه والله انا العين تدمع يوم تقراها......
القصيده بعنوان.... " طاف عام " .... للأخت الجميله الحساسه " بنت الدماني " .....
في ذمتكم مب حرام مثل هالقصيده بعد فتره بتكون في مكان بعيد في هالمنتدى ويمكن بعد تكون منسيه....
أنا ببدأ بجمع أجمل القصايد وبسوي الديوان.... وأول القصايد فيه قصيدة الخيال الشارد وبنت الدماني.....
طبعآ كل قصيده بتنحط لازم ينحط تحتها أسم الشاعر...
السموحه على الأطاله....
أخوكم كلام العين....