((نوف))
الحين الساعه صارت خمس وهذا للحين راقد..
لاصلاه ولادين...
طلعت من غرفتي ..وتوجه على طول لغرفة سلطان..
دقيت الباب لكن ماشي فايده ...لا حياة لمن تنادي..
فتحت الباب ودخلت الغرفه
حشااا بغيت اموت من البرد
هذا كيف راقد جي ..
رحت لعند سريره وحاولت اقومه ..لكنه ما كان يتحرك
نوف: سلطااااااااااااااااااااااااان ..سلطاااااااااااان ..قوووووم بسك ارقاد..
ما يرد علي شسالفه ...اخاف فيه شي
رحت الحمام ويبت ماي بكوب كان حاطه يم السرير
ترسته ماي بارد ...ورجعت لعند سريره وكبيته على راسه
نوف: حشاااااااا كل هذا ارقاااااد ..شسالفه
قلبي عورني وخفت حسيت انه في شي صار له
طلعت من الغرفه وقعد انادي على امايه..وعلى طول..يت تركض وراي
ام عيسى: سلطااااااااااااان ..قووم فدييتك شفيييك
قامت امي تهز جسمه حيل ..بس ما كان يتحرك ولا يطلع اي صوت..
بدت ادموعي تنزل بدون ما ادري..وامايه خلاص اشوي وبتنهاار
تقربت منه وقعدت اصيح ..
نوف: سلطااااان ..الله يخليك قووم ...دخييييييييييييلك قووم
ام عيسى: قوومي نووف... اتصلي في ابوج خليه ايي بسرعه ..يالله قوومي
قمت من عدال سلطان وكنت بطلع برا بس حسيت بايد تمسك ايدي..
طالعت جهة سلطان ..وشفت ويهه ..كان مغمض عينه وماسك ضحكته..
مسكت المخده من تحت راسه وضربته فيها واهوو يضحك
ام عيسى: غربلااااااااااااااااتك من ولد...اتسوي نفسك تعبان..
عصبت وطلعت برا الغرفه..
اما انا ما هنا لي بال الا لما اطلع حرتي فيه هالخايس
عيل يقص علينا ..والله انه متفيج..
(( سلطان ))
حاولت على قد ما اقدر اني ما اضحك مع انه شكل نوف وامايه
كان يفطس من الضحك...
لو ما اني كنت خايف انه عمي يسوي لنا سالفه ولا كنت كملت التمثيليه لين
ايي عمي..بس ماا فيني الصراحه على حشرته ..
مسكت ايد نوف قبل لا اتروح..
وامي عصبت مني..ونوف هلكتني من الضرب...
نوف: يالخااااااااااااااااااااس والله انك مافيك ادب جي اتخرعنا عليك..والله على بالي انك مت
سلطان: هههههههههههههههههههههههههههههه..والله شكلج كان يفطس من الضحك هههههههههههه..
نوف: ماا عليه مب منك من الى يخااف عليييييييييك ..سخيف واحد..
وركضت بسرعه وطلعت من الغرفه واهي تمسح دموعهاا ..
والله كسرت خاطري..ما كان قصدي اخرعها ..كنت اسولف معاهاا..
قمت من السرير ..واشوي ودخل عيسى ..
عيسى: هههههههههههه ..شوفيها هالخبله؟؟
كنت عاطنه ظهري وقاعد ادور تلفوني
سلطان: منوو؟؟
عيسى: هااي اختك الخبله نوفله
سلطان: ههههههه ليش شو فيها
عيسى: مرت من عدالي وكانت ميته من الصياح ..اقول حقها اشفيج ..جان تضربني على راسي ودخلت غرفتها هههههههههههه..وانا واقف بعد ما ربعت وراها اضربهاا ..هههههههههه منصدم
سلطان: هههههههههههههههه فدييتها نوفله ..بروح اراضيهاا
عيسى: ليش شو سويت فيها انته...
سلطان: ما سويت لها شي بس سويت نفسي ميت..وما تحركت..اخترعت علي ونادت امايه ..هههههههههه والله عصبت امايه يوم درت اني استهبل عليهم
عيسى: هههههههههههههه خساره جان زقرتني فااااااااتني والله
حز في خاطري والله ما كنت قاصد اخرعها بس اهي الله يهديها وايد حساسه
سلطان: حليلها والله اختي بروح اراضيها..ما اتهون علي اخليها جي..
عيسى: هيه وحليلها روح راضهاا ..
مشيت انا وكنت بطلع من الغرفه بس شفت عيسى نام على سريري وتغطى كان ارجع مره ثانيه..ووقفت عداله
سلطان: نعم ..منووووو سمحلك..
عيسى: محد سمح لي بس مكيف غرفتي خربان وانا تعبان ابي ارقد ..
سلطان: لااا والله واحد قالك اني فاتح ملجا ..
عيسى: دخيلك سلطان خلني ارقد..
سحب اللحاف وتغطى
وانا ما قدرت اقوله شي ..طلعت عنه ورحت غرفة نوف..
دقيت الباب ودخلت.. لقيتها دافنه راسها في المخده واتصيح
تقربت منها وقعدت على السرير..
سلطان: نوفله
نوف:.....................
سلطان: نوفله فديتج والله مب قصدي ..كنت اتغشمر معاج فديتج لا تزعلين..
ما رفعت راسها وزاد اصياحها
غمضتني والله
سلطان: فدييتج اختي والله مب قصدي خلاص عاد لا اتصيرين حساسه واايد..
رفعت راسها وقعدت تمسح دموعها وقامت من على السرير وقربت يمي
نوف: قوووووووووم ..
سلطان: وين اقوم
نوف: اطلع برااا
سلطان: من صجج انتي ..يالله عااد ...
تمت ساكته وحاطه ايدها على خصرها..
نوف: انته اشفيييييك ماا تفهم
سلطان: يااا اخي خل عندك دم هههههههههههههههههه ..شو بتقولي شعر انتي
نوف: اووووووووووف ..يالله اطلع برا قبل لا انادي لك امايه ...
شكلها كان جاد اول مره اشوفها جي
سلطان: هههههههههه اشفييج ...يالله عااد والله ما اتهونين علي
نوف: ما اهون عليك واتسوي فيني جي
سلطان: فديتج نوفله والله اسولف معاج ....
نزلت راسها وتمت ساكته..
سلطان: يالله عاد انا اخوج الكبير ..مالي خاطر عندج ...خلاص ما بعيدها مره ثانيه
نوف: وعد..
سلطان: وعد ههههههههههه ..يالله عاد اضحكي..
ابتسمت ..ومسحت لها على شعرها ...
حسيت بالراحه بعد ما راضيتها
قمت وطلعت برا ..رجعت غرفتني وسبحت وصليت وخذت اغراضي وطلعت من البيت
(( بدور))
الساعد 2 الحين وانا مب قادره ارقد ...ما ادري شوفيني ..قمت وشغلت الكمبيوتر... فتح النت وقعدت اتفرج على المواقع...والمنتديات ...مليت ..فتحت المسنجر...وما لقيت احد اون لاين ..خليته مبطل ...قعدت اطالع اميلاتي...اشوي
ودخل
من يحبك كثر ما احبك انا: السلام عليكم ورحمة الله وبركاته
بدور: هذا شيبي اووووووف ..ارد عليه ولا لا ...
قعدت جي ربع ساعه وانا اكلم نفسي محتاره ارد عليه ولا لا
من يحبك كثر ما احبك انا: السلام لله يا اختي
امري لله خلني ارد عليه واشوف شيبي
بدر البدور: وعليكم السلام ورحمة الله وبركاته
من يحبك كثر ما احبك انا: شخبارج؟؟
بدر البدور: الحمدلله
من يحبك كثر ما احبك انا: ليش طلعتي الصبح؟؟انا قلت لج شي ضايقج؟؟
بدر البدور: لا
من يحبك كثر ما احبك انا: عيل ليش طلعتي؟؟
بدر البدور: بس جي كيفي
من يحبك كثر ما احبك انا: اختي انتي فاهمتني غلط..انا والله ما ابي منج شي ..ولا بسوي فيج شي..انا من اول مره كلمتج فيها حسيت انج غير عن كل البنات..حسيت انج انتي الانسانه الى بتفهمني وبتطلعني من الوحده الى انا فيها ..صدقيني انتي ما اتعرفين انا كيف عايش ..والله افهميني الله يخليج..
ما عرفت شو ارد عليه كلامه خلاني..احن عليه
بدر البدور: انزين وانا شيخصني؟؟ليش اتقولي هالكلام
من يحبك كثر ما احبك انا:ابيج تعطيني فرصه ..خليبنا نتعرف على بعض واذا تضايقتي مني تقدرين اتسوي لي بلوك ..انا ما اطلب منج غير انج تعطيني فرصه
بدر البدور: اوكي
من يحبك كثر ما احبك انا: ^_^... انا اسمي فهد وانتي ؟؟
بدر البدور: بدور
من يحبك كثر ما احبك انا: عاشت الاسامي يا بدور
بدر البدور: عاشت ايامك
من يحبك كثر ما احبك انا: كم عمرج؟؟
بدر البدور: 19
من يحبك كثر ما احبك انا:العمر كله ان شاءالله يا بدور
بدر البدور: تسلم
من يحبك كثر ما احبك انا: تدرسين؟؟
بدر البدور: هيه ادرس
من يحبك كثر ما احبك انا: وين؟؟
بدر البدور: في الكليه..
من يحبك كثر ما احبك انا: بالتوفيق ان شاءالله
بدر البدور: ثانكس
من يحبك كثر ما احبك انا: من وين انتي؟
حشاا هذا هذربان وايد يسال اوووف
بدر البدور: من الأمارات
من يحبك كثر ما احبك انا: والله؟؟ ومن وين في الامارات؟؟
بدر البدور: من كل مكان ومن اي مكان
من يحبك كثر ما احبك انا: هههههههههه خلاص على راحتج اذا ما تبين تقولين ..المهم ما سالتيني شي عن نفسي ولا ما يهمج اتعرفين؟؟
صج رزه غصب اهو اسال
بدر البدور: لااا ما يهمني
من يحبك كثر ما احبك انا: اوكي على راحتج
مرت ثلاث ساعات وما حسيت بالوقت قعدنا انسولف عن اشياء وايد
وبصراحه بديت اتعود عليه وارتحت له وايد..
بدر البدور: انزيين ما قلت لي انته من وين؟؟
من يحبك كثر ما احبك انا: مساع تقولين ما يهمج تعرفين ..غيرتي رايج..
بدر البدور: يعني ما تبي اتقول اوكي خلاص ما ابي اعرف
من يحبك كثر ما احبك انا: ههههههههههههههه فديت انا هالويه الى امبوز ربي لا حرمني منه ..خلاص لا تزعلين بقولج
بدر البدور: مااااااااباااااااا
من يحبك كثر ما احبك انا: هههههههههههه والله خلاص اسولف معاج ...يالله عااد لا تتدلعين ...
بدر البدور: قلت لك ماااباااا غصب اهو ..
من يحبك كثر ما احبك انا: انزين علشان خاطري عاااد ..
بدر البدور: ماااباااااااا ...
وناااسه والله ..انا ما كنت زعلانه منه بس جي حبيت اتغلا
ابي اشوف شو بيسوي
من يحبك كثر ما احبك انا: حراام عليج والله ما يسوا على ...خلاص زين اخر مره والله..
بدر البدور: خلاص خلاص انا بطلع بااااي
من يحبك كثر ما احبك انا: لااااااااا والله ما تطلعين ..حراااااام عليج لا اتعذبيني والله انا آسفه ..الله يخليج لا تطلعين
ما رديت عليه وطلعت
بندت الكمبيوتر ورقدت...او حاولت ارقد لاني ما قدرت كنت افكر فيه ما اعرف ليش.. احس باحساس غريب تجاه هالانسان..
(( محمد))
بعد مرور شهر.. وكان اليوم خميس وناسه ماشي مدرسه ..كنت قاعد في الصاله مع ابويه..كان يسولف لي عن ايام اول ..والله استانس وايد على سوالفه...اشوي ودخلت بدور كانت يايه مع امايه من برا حشا طالعين من العصر والحين بياذن العشا ..
ام محمد+ بدور: السلام عليكم
ابو محمد+محمد: وعليكم السلام...
عقت امايه عبايتها وقعدت عدالي ..اما بدور فكانت تبي اتروح غرفتها وشكلها كان مستعيل..قبل لا تطلع
محمد: بدور
وقفت بس عطتنا ظهرها
بدور: نعم
محمد: شفييج مستعيله ..تعالي اقعدي معانا اشوي..
بدور: تعبانه وبروح ارتاح في غرفتي
ابو محمد: روحي فديتج ..ما عليج منه
طلعت بدور من الصاله جنها ما صدقت انه ابويا قال لها روحي ..
طالعت ابويه
محمد: ابويه مب زين جي بدور صارت كله تقعد في غرفتها وما تطلع ولا تقعد معانا اكيد فيها شي
ام محمد: وانته اشعليك باختك...مالك شغل فيها خلها اتسوي الى تبيه
تقرب مني ابويه وحطى ايده على راسي..
ابو محمد: شبينك وبين اختك ...؟؟ ليش تعاملها جي؟؟انتوا متضارببن؟؟
محمد: لاا ابوياا ..لا متضاربين ولا شي ..بس انا احس انه بدور تغيرت واايد..
ام محمد: بسك هذربه ويالله قوم روح غرفتك ..ولا روح عند ربعك..
انصدمت من رمست امايه
محمد: هالكثر يعني مضايقتج قعدتي بينكم..
قمت من مكاني وطلعت براا ..ابويا كان يناديني بس ما رديت عليه وتصلت بسلطان وطلعنا نتمشا..
قعدنا عند البحر..
سلطان: حمووود
محمد: هااا
سلطان: شفييك؟؟
محمد: ما فيني شي
سطان: علي انا ..طالع ويهك كيف صاير ..وحواجبك متضاربه ههههههههههه شسالفه؟؟
ضحكت من الخاطر على كلام سلطان مع انه ما كان لي خاطر اضحك
محمد: الله ياخذ بليسك ..شهالرمسه...يا ابوي قلت لك مافيني شي..
سلطان: متضارب مع بدر؟
محمد: لا
ابي اطفر فيه
سلطان: مع بدور
محمد: لا
محمد: عيل شوو تكلم ..لاا اعطيك كف على ويهك الحين
محمد: هههههههههههه انزيين بقولك..
حكيت له كل الى صار وقلت له الى في خاطري..
تم ساكت وما تكلم
محمد: شفيك؟
سلطان: ما شي بس استغربت من طريقة تعامل امك معاك..ليش اتسوي جي..
محمد: ما ادري والله..ساعات احسها تحبني واتخاف علي..وساعات احس جني مب ولدها..
سلطان: والله هذولي الاهل ما اعرف شو في عقلهم ..يا خي طريقة تفكيرهم تخلي الواحد يكره نفسه.. انته بعد احمد ربك عايش مع امك وابوك اما انا ..امايه في مكان وابويه في مكان ..يالله ربك كريم شبنسوي بعد ..محد يختار اهله..
بعد ما خلص سلطان جملته تمينا ساكتين وانطالع البحر..
(( بدور))
كنت قاعده اعد الساعات والثواني ابي رجع البيت ..احس بشي في قلبي يشدني
اول ما وصلنا البيت كنت بصعد غرفتي بس شفت ابوي محمد قاعدين ..استحيت اروح وما اسلم عليهم...
صعدت غرفتي بسرعه...وعلى طول وقبل لا اشيل عباتي
شغلت الكمبيوتر..وفتحت النت ..حاولت افتح المسن بس ما رضى يفتح ما اعرف شوفيه..
خليته يولي وفتحت الاميل...بس بعد ما رضى يفتح ماا ادري شسالفته
قمت عنه وبدلت ثيابي ..ورجعت احاول مره ثانيه لكن نفس الشي ..مب راضي يفتح...
ياست انه يشتغل ..بندته ورحت اصلي العشا..وبعدين نزلت اتعشى
خلصت عشا ورجعت الغرفه مره ثانيه..
حاولت اني اشغله مره ثانيه ...
وتفجات انه اشتغل.. استانست وايد..
بس للاسف ما حصلته اون لاين..خليته مشغل وقعدت على السرير احل الواجب..
يات الساعه 3 واهو للحين ما دخل ..
طرشت له حوالي 3 اميلات لكن ما شي فايده..
ياست انه يدخل ولا يرد على اميلاتي..
حطيت راسي ورقدت..
قمت العصر واانا متدوخ من الخاطر ....
صليت العصر وفتحت الاميل ...على وعسى اشو ف اميل منه
الرسائل الوارده:1
من: مجهول
السلام عليكم ورحمة الله وبركاته
شخبارج يالطيب ان شاءلله تكونين بخير...وبالف صحه وعافيه ...اختي انا متاكد انج ما اتعرفيني..بس انا اعرف عنج شي بسيط ...وغرضي كله خير ولاني ناوي اضرج..وابصراحه انتي الى كاسره خاطري ..والله يكون في عونج...
طبعا انتي عارفه شو اقصد عن شو اتكلم ...الشخص الى انتي اتعرفينه ..واحد نصاب وحرامي ..وكل يوم ينصب على وحده ...حتى احنا يالشباب ما سلمنا منه ....
المهم انا ما بطول عليج ..ولا اتخافين ..ترا اهو خذ جزاه واكثر ..وانتي ديري بالج على نفسج ولا اتخلين نفسج لعبه حق اشكاله ...صوني نفسج ..
السموحه منج
فاعل خير
(( حمد))
قمت من النوم وأنا قاعد اشتم كل واحد في المدرسة ... متى افتك من المدرسه و اهمومها ..رحت اغسل ويهي وابدل ملابسي
نزلت تحت اتريق قعدت يم اختي الصغيره أسيل صف ثالث ابتدائي
اللي ايشوف طريقة رمستها ايقول جنها عيوز..
هذاك اليوم شافتني ياي من برى متأخر جان اتقولي واهي اتصرخ وشاده الحيل
أسيل: حضرتك من وين ياي ؟
وليش متأخر ؟
وما اتعرف احين الساعة جم ؟
قلت لها نعم عمتي اشبغيتي وجان اشيلها بيد وحده ووديها فوق قتلها قولي اتوبه قعدت تضحك واهي اتقول اتوبه
حمد: ههههههه ثاني مره ان سمعتج اتقولي حقي هالكلام بفرج من الدريشه ...
كنت قاعد اتذكر هالموقف وانامبتسم بعدين حسيت انه في احد قاعد يدزني ولما انتبهت جان اجوف اسيلو الخبله قاعده ادزني ...
اسيل (واهي تضحك) : انت اشفيك تضحك ... انت مينون
حمد (وهو يضرب اسيل على راسها بحيل ) . جب انتي
خالد (واهو نازل من الدري ) : منو ينجب ...وليييييش تضرب اسولة
حمد : لانها شيطانه .
خالد اهو اخوي الكبير عمره 20 سنه وهو في جامعه ويدرس هندسة كمبيوتر عسب جي ما اتشوفه الا نادرا مع انا نحن في نفس البيت واهو ايموت فاسيل لانه اهو الي اختار اسمها ومايرضى انا احد يشتمها او يضربها ...بس انا .ما اطيقها لانها دلوعه وكل طلباتها مجابه ...اما انا الفقير اذا طلبت شي
لازم اتريا سنه الين ما ايبونه حقي...
نزل خالد ووقف عدالي..وعلى طول اسيل طاحت في حضنه
خالد : وانا جم مره قايلك ماتضرب اسوله ... ولا انت بس فالح تتشطر على اللي اصغر منك..
حمد (وهو امعصب ) : اشقصدك .
خالد : قصدي واضح
استغربت من كلامه ..شقصده ..انا الا كنت الاعبها وهذي اختي الصغيره مستحيل اضرها بشي
حمد: خالد..مب معناته اني اضرب اسيل يعني انا ما احبها
اسيل اختي مثل ما اهي اختك
وقبل لا يرد علي ..دخل علينا عمي
مطر وعمره 30 سنه
سكن عندنا من ماتوا ابويه وامايه الله يرحمهم
مطر حس انه بينا شي لانه اول مره ناكل واحنا ساكتين
مطر: السلام عليكم
خالد+حمد: وعليكم السلام..
مطر: اسووله حبيبتي شخبارج
اسيل: بخير ..
مطر: وينج امس ما شفتج ..كيف ترقدين قبل لا تعطيني بوسه
ابتسمت اسيل وراحت قعدت في حضنه
اسيل: اسفه عمي بس انا كنت تعبانه وجان اروح ارقد
مطر: فدييتج نوم العوافي وبعدين انا كم مره قايل لج لا اتقولين عمي
اسيل: عيل شو اقول
مطر: قولي بابا مطر
اسيل: ان شاءالله
كل هذا صار وانا وخالد ساكتين وكل ولا طلعنا بعض
ما اعرف شو سالفته
وشو الى صار وخلاه يقول هالكلام
مطر: شسالفتك انته وياه؟؟
رفعت راسي واطالعت خالد شفته منزل راسه وجنه ما يسمع
حمد: ليش شو صار؟؟
مطر: ما ادري اشوفكم ساكتين اليوم لا ضرابه ولا حتى سوالف
حمد: اجازه ههههههههههههههههههههههههههه بس مب كل يوم هالاكشن
مطر: لا والله ههههههههههههههههه
واشوي واسمع هرن الباص وعلى طول طلعت عنهم ورحت المدرسه
....لحظة العمر...
بعد مروور عدد من السنوات
)) سلطان ((
اليوم اهي لحظة حياتي اللحظه الى كنت انتظرها من زمان ..صار لي مده اترجاها واليوم بس حنت علي ووافقت اني اي اخطبها ..اهي كل شي في حياتي اهي الهوا الى اتنفسه واهي الزاد والماي الى اشربه ..وين ما اروح اشوفها ..في عيون كل انسان على وجه الارض اشوفها ..في كل اتجاه اطالع فيه اشوفها..ما كنت اقدر اوصل لها ..كانت لي اهي مثل السحاب الى عمري ماراح اقدر اوصل له وصعب اني في يوم اوصل له بس الى كان يكفيني ويخليني اتحمل بعدها عني اهو جمالها وقوامها الى يفتن..كنت اترجا الصبح يطلع ويحل المسا بس علشان تيي هاللحظه الى من زمان اترياها ...
اول ما اذن العشا صليت ورجعت البيت بسرعه ..لبست اثيابي ..وعدلت غترتي اليديه وحطيت عليها العقال ...قعدت اطالع عمري ..في المنظره ...صدق اني معرس...
تعطرت ..وخذيت بوكي وتلفوني ...وطلعت بسرعه من الغرفه ..كنت انزل الدري وانا اتشوق اني اوصل لاخر حد في الدري بس علشان يمر الوقت بسرعه
نزلت تحت وحصلت امايه قاعده في الصاله تدخن عمي الى اهو زوج امي ..اول ما خلص وقفت انا ..ودخنتي ..
ام سلطان: قلت حق ابوك ايي ؟
سلطان: هي امايه قلت له لا اتحاتين وقالي ..بيي ما بيتاخر ..
ام سلطان: ايي هين جان ما بيتاخر ...
سكت انا وما علقت على الى قالته ..
سلطان: خلاص اماايه اختنقت ...
ام سلطان : انزيين يالله امشي جدامي ..تاخرنا على العرب وايد...
ابو عيسى : وين عيسى ؟؟
وقبل لا امايه تجاوبه ..دخل عيسى الصاله ..
عيسى: انا هني طال عمرك..هاااا جهزتوو؟؟
سلطان: يالله يالله على الكشخه...حشى انته المعرس مب انا ...
عيسى: عشوووووووون عيل ...ههههههههههه ..خلني اتعدل يمكن يزوجوني اختهاا..
ام سلطان: غربلاات ابليسك من ولد ....اقطع هالرمسه ويالله اشوف جدامي ...خلنا انروح حيرنا العرب
ابو عيسى : يالله انا بودي امكم ..وانتوا روحو بروحكم ...زيين
سلطان : ان شاءالله ابويه ...يالله عيسى سرينا ....
طلعنا انا وعيسى ...ركبنا السياره..وخلينا الشواب الى بعدهم ما طلعوا من البيت ...من كثر ما انا متشوق حق هاللحظه حسيت..انهم تاخروا ..
سلطان: عيسى روح شووف هالشواب ترا حيرونا ..
عيسى:ايييييه اشفييك انته ..تونا الا راكبين السياره ...انته الى راكض قبل الناس ..حليلهم ..خلهم يمشون على راحتهم ...
سلطان: شوو يمشون على راحتهم ..اقولك انا ينتظروناا ..يالله قوم استعيلهم ...
ما رضى عيسى ينزل وانا تميت اتحرقص بالسياره اترياهم يركبون سيارتهم علشان اتحرك انا بسيارتي ...بعد خمس دقايق ...تحرك الشيبه وطلع..بسيارته قبل ..لكن بعد دقيقتين سبقته انا ...
عيسى: سلطانوووو ..اشفييك انته ...العروس ما بتطير ..بنتفدنا بسواقتك..
ما كنت منتبه له ..
عيسى: سلطانوووو وقف السياره..
دزني وحاول انه يوقف السياره...
سلطان : اشفييك انته؟؟
عيسى : وقف السياره قلت لك ...يالله بسرعه ..
وقفت السياره على الرصيف وانا متغصص ..ناقص انا تاخير ...
سلطان: يالله وقفنا السياره ..اشعندك..
نزل من السياره بدون ما يرد علي.. واشوي ولا اشوفه يدق الدريشه ..فتحت الباب ..
عيسى: انزل اشووف ..يالله بسرعه ...
سلطان: عيسوووو والله مب متفيج لك..شسالفه ...شتبي ...يالله قول ترا تاخرنا واايد...
عيسى: انزل قلت لك ..يالله بسرعه ..انا بسوق....بتنفدنا انته لو خليتك تسوف ..وانا مب بايع حياتي ...
نزل من السياره وقعدت مكانه واهو قعد مكاني وساق ...بعد خمس دقايق وصلنا ...ويات اللحظه المنتظره ..
وقفنا عند الباب ننتظر سياره عمي وامايه ..تاخروا وايد ..ولا انا من لهفتي حسيت انهم تاخروا ..المهم انهم في النهايه وصلوا ..دخلنا رباعه ..وضيفونا ..قعدنا انسولف ...وانا كل اشوي اطالع ساعتي ..ابويه تاخر ..وكل ما اتصل فيه ما يرد على شسالفه ..
عيسى: سلطان مب جنه ابوك تاخر واايد ..صارت الحين الساعه 11 ..فشله قاعدين للحين في بيت الناس لا رمسنا ولاطلبنا ايد بنتهم ..
سلطان: والله ما ادري شسالفته وليش تاخر ...اهو وعدني انه ما يتاخر ..اكيد في شي صاير له ....
عيسى: انزين اتصل فيه ..
سلطان : اتصلت كم مره لكنه ما يرد علي....بشوف بتصل على تلفون مرت ابوي ...ولو اني ما احبها..هالعيوز..
اتصلت في البيت ..ومحد شله ..لكن قبل لا اسكره ..سمعت احد يقول الوووو..
حاولت اعرف منو الى رد لكني ما عرفت الصوت..
سلطان: الوووو
الشرطي: الووووو منو معاي؟؟
سلطان: انته الى منو ؟
الشرطي: انته تصير حق راعي التلفون ..
سلطان: هيه نعم تلفون مرت ابوي هذا شسالفه؟وينها اهي
بدا صوتي يعلا ..وكل الى كانوا في المجلس اسكتوا ..
الشرطي: والله ما اعرف شو اقولك ..بس صار حادث وماتوا كل الى في السياره وهالتلفون كان موجود قريب من الجثث ...
قمت من مكاني وانا خلاص اشوي وبنهار ..حسيت اني مخنوق ..
سلطان: انته شتقول ..شتخرف ..ابوياااا اخواني ..كلهم ماتواا ...كيييييف ..انا من ساعه كلمته ...وقالي انه بيي ..انته جذااااااب
عقيييييت التلفون من ايدي ..قعدت على الارض وادموعي تنزل مثل النهر ...مب مصدق الكلام الى قاله ...ابويااا ...من ساعه كلمته وكان يضحك ...ومستانس قالي انه بيي يخطب لي ...
طلعت من البيت وركبت سيارتي ..مشيت فيهاا وانا مب عارف الدرب الى بروح له ..كنت امشي بالسياره وانا مب حاس بنفسي وين بروح ووين بوصل...
مرت ايام العزا كئيبه ..وكنت فيها مثل الميت الحي ..ابوي مات وخذا معاه اخواني عمر وسعيد..توهم اصغار ما شافوا من الحياه شي ..محد بقى غيري ...منو بيدير الحلال من بعده ..طبعا ما في غيري ...الحمدلله اني كنت اشتغل عنده وودرت شغل الحكومه ..ولا الحين كنت ما بقدر اتعامل مع الموظفين والشغل بحد ذاته...
*****************************
ابوسعود: طبعا ...سلطان ...كبرت املاكه وحلاله ...وتزوج ..واهو بعده عظمه طري ....ودار املاك ابوه ...واهو في هالسن .......
ابوسالم : ....هيه ..شو يتقول عنه ولا شو بتقول ...اذكره ..ما شاءالله عليه .... هيبه ما عند احد ....
سالم : ...زين عيل شو الى خلاه يصير جي ...؟؟
ابوسعود: الله يسلمك ...سلطان بعد ما تزوج ...ياب بنت وولد ..شوق وخالد ....
طبعا خالد لما كبر ...كبر راسه معاه ..وامه ..الله يسامحها ..كبرت راسه ..وخلته ينهب افلوس ابوه ..ويرفع عليه قضية ما اعرف شو اسمها ....ومن هالسوالف ...
وسلطان طاح مريض ...من يومها ..وكله في المستشفيات ....لين يومك هذا ..طلع وخذته بنته شوق عندها ...وعلى هالحال ...
ابو سالم : الله يشفيه ويهديه ان شاءالله ....والله ما يستاهل ...
ابو سعود : ربك كريم ...لكن الله بيراويه ...بيصير له مثل ما صار لبوه وزود .....بس سلطان غلط غلطه وحده ..واهي ..انه ما كان يساعد فقير ولا محتاج ...كان متكبر وعصبي..وينهب فلوس الفقارا ...وغير هذا ..ابدا ما ساعد اهله ولا قام ايهم ..الفلوس غيرته واايد ..
ابوسالم : اتصدق يا محمد ..ابدا ما تخيلت انه يصير فيه هالشي...لما شفته والله انه قلبي قام يقرقع ..ابدا ما توقعت انه يكون سلطان وللحين مب مصدق...
ابوسعود: شتقول انته يا راشد....سلطان وانا ياره ..لما كان يشوفني ما كان يسلم علي..مع انه كنا ربع ...واكثر من ربع ...
سالم: عيل رفيجكم الثاني حمد وينه ...وشو صارفيه؟؟
ابوسالم : حمد مب احسن من سلطان ...هذو طايح في السجن ..لا حول له ولا قوه ...خمار وسكار ...وماشي فايده منه ...اللهم لا شماته....
سعود: سبحان الله مغير الاحوال ....
ابوسالم : لو كان ربى ولده على الدين والاخلاق... وكان كريم وطيب مع الناس ..جان ولده تعلم منه ..وصار احسن منه بعد ..لكن شو بتقولون.. الحب يطلع على بذره ...
ابوسعود: صدقت والله ...
سعود: (قام وباس ابوه )...ربي يحفظك ويخليك لي ...ولا يحرمني منك ان شاءالله ...
ابو سعود: ولا منك يا ولدي....
****************************************
لحظة الشقاوه ولحظة للعمر ..ولحظة العجز...لحظات تذكرناها...وهذي....مقتطفات من هاللحظات ...احلى واجمل لحضات في حياتنا ...بس كم بنعيش وكم بتم لنا هاللحظات ....كم بنفكر وكم بنسوي ...منو يحس فينا ومنو يهتم ...لحظات تمر علينا ..تمر بسرعة البرق ...ونحاول نعيش ونستفيد من كل دقيقه فيها ...هذي بعض لحظات مختصره من حيات اشخاص ...ضحكتهم وبسمتهم ...ولعبهم ...لكن لين متى بتم هاللحظات ...
كل انسان في هالدنيا ياخذ نصيبه ...وسلطان ..خذ نصيبه ...مثل ما زرع حصد الى زرعه في ولده ....
هذي اهي لحظاتنا ....وايام جميله من حياتنا الى ما نقدر ننساها ...
^^^^^العمر لحظات ^^^^^
أنتظر آرائكم وانتقاداتكم ..لا تحرموني من رايكم