السلام عليكم والرحمه ...

كلنا نحب نروح البر ونحب نعزب فيه كم يوم ... يعني نخيم فيه

اولا : التخييم

تنصب الخيام في مكان تثبت فيه الاوتاد عشان ماتهز الخيام الريح وتطيرها ، او تفتك الاوتاد واطيح الخيمه ..

وتنصب الخيام على مسافات شبه متقاربه عشان الذاري (( المهب ،، الريح))

يتجنب نصب الخيام في البحص والسيوح اللي فيها انحدارات او على مجاري الوديان وذلك تجنبا لاي خطر ..


اهم شي لطلعت البر هو الزاد ..

والزاد مقسم الى :

الماء

الطعام


الماء: اهم شي في الرحله ولاحد يعتمد على الدكاكين ،، يعني بنسير ونلقى دكان او محل وبنشتري منه ماء؟؟

الافضل ان الماء اول شي لازم ينشل .. والماء نوعين

شروب: للشرب وطهي الطعام وعداد القهوه والشاي
غسول: للغسيل والاستخدامات الخاصه

يفضل تحميل كروزل حوض بطرمبات ماي عشان ماتكون هناك حاجه للبحث عن الماء

اهم شي في استخدام الماء هو .. الهمر ..

يعني الهمر بالماء .. قولة يهمر يعني يقتصد . من المعروف ان البر مكان خلي ولهذا ماحد يلعب بالماء في البر لانه اهم شي هو الماي .




الطعام .. اول شي تشله الاسره الخليجيه هو العيش ((الارز)) لانه الغذاء الكامل المتكامل .. والطعام في البر يختلف عن اللي في البيت وطريقة طبخه ايظا تختلف .. ففي البر تنقسم الوجبات الرئيسيه الى :

ريوق: على حسب .. مثل بلاليط .. قرص .. عصيده.. قروص وغيرها ..
غداء: عيش
عشاء : عيش ... ثريد .. شوايا ..

والوجبات الفرعيه اللي هي بعد الساعه 10 .. مثل،، فرني .. حمسه ((الحمسه هي الشوايا , شوايا الذبيحه )) وغيرها..


ومن الاشياء الضروريه ايظا هي اللحف:
الاغطيه الكافيه والتويع فيها .. مثل اغطيه البرد .. والفرش والزوالا (( جمع زوليه )) والحصر (( جمع حصير )) والوسايد .. والبطانيات ..

وللحفاظ عليها يجب عدم تركها خارج الخيام في وقت الصبح .. بسبب الطل والضباب

وفي وقت الليل .. لنفس الاسباب ..

اما في وقت الظهر والشمس فتنشر اللحف في الشمس وذلك للتعقيم

نتطرق الى اختيار الماكن المناسب .

يوم نبى نخيم بالصوره الصحيحه نختار مكان سهل ومنبسط وبعيد عن مجاري الاوديه وعن المنحدرات الجبليه .. هذا اذا كان التخييم في الوديان والشعاب ..

اما اذا كان في البر فافضل مكان هو حول الظلال وحول العراقيب .. ولايتم التخييم فوق النقيان او العراقيب .. ولكن يختار مكان عدالهن عشان الذرى ...


طريقة نصب الخيام :

طبعا يتم تنصيب الخيام بشكل ثابت ومحكم ولايكون التخييم بشكل متباعد جدا .. بل على مسافات قريبه ومتساويه .. وذكرنا السبب .. اللي هو القرب من بعضها البعض .. تجنب الذاري والمهب بالاظافه الى تشكيل مخيم متقارب من اجل تغطيه المكان ..



نصايح:

عدم شب الضو داخل الخيمه وذلك تجنبا للحرائق وابتعادا لمشاكل الوقوع فيها من قبل الاطفال

الضو تنشب عدال كل خيمه وبعيده شوي منها .. والضو العوده في مكان يجمع مابين الخيام .. ولكن الافضل عدال اكبر خيمه او اكبر الموجودين سنا ..

عدم رمي المخلفات عدال امكان التخييم وذلك تجنبا للحشرات والقوارض

عدم القاء اي نعمه عدال اماكن الاقامه وذلك تجنبا للدغ والحيوانات الليليه والبريه

الحفاظ على اماكن الاقامه

الانتباه الى الاطفال واماكن لعبهم

اخذ الحيطه والحذر والتزود بكافه طرق الحمايه والمستلزمات الطبيه والضروريه



تحياتي لكم ورحله جميله للجميع واللي بيعزم ايرح رحله بريه لاينسى يعزم اعضاء المنتدى