أبدا بذكر اللي خلقنا من الطين= الواحد اللي كلّ شي بامره يكون

الخالق اللي كوّن الكون تكوين= العالم بحال الملا لو يخبّون

و ارسل تحيّات ٍ شذاها رياحين= من خافق ٍ ف الحب ذايب و مفتون

للي غلاته من غلا الروح و العين= و اغلى بعد .. حتى العمر لجله يهون

نسل الكرام اللي على القلب غالين= اللي لهم في خافقي قدر مصيون

شخص ٍ تحمّلني على العسر و اللين= و ان كنت في ضيقه يقدّم لي العون

سمح المحيّا من يجاريه ف الزين= لي من تبسّم ينتشي قلب محزون

ما ريت مثله .. لا ولا منّه اثنين= كلّه على بعضه عسل صافي اللون

حبّه ف قلبي فاق كل الموازين= لا ما تغيّره الوشايه و لظنون

ولو صار مهما صار نبقى محبّين= خل العواذل من قهرهم يموتون