السلام عليكم ورحمة الله وبركاته
يقال الكلام ببلاش ما عليه جمارك ... بس للأسف في ناس ما تقدر هالشي ولا ينتبهون لأعمارهم ... ويتفلسفون على شي وهم ما يفهمون فيه ويطلعون فضايح بدون ما ينتبهون
ردي ليس معمم على جميع الناس ... ولكن على فئة معينة وهي اللي مشوه سمعة الفئة النظيفة الشريفة  | اقتباس |  | | |  |
المشاركة الأصلية كتبت بواسطة الفراشة |  | | | | | | | | |
السلام عليكم ورحمة الله وبركاته
صديقتي تقرأ لهذا الشاعر وطرشت لي القصيده
صراحه حبيتها ولو فيها بعض المبالغه
بس عجيييييييييييييييبه
| |  | |  | |
وعليج السلام والرحمة
اشكري صديقتج من بعد شكري لج على نقل هالكلمات لأنها هي السبب اللي خلاج تنقلين هالكلمات عشان نشوف بعض هالعينات المريضة نفسيا
الحين اسمحولي برد على صاحب هالكلمات ...
في أول بيت بنقول بديت بأسلوب محترم نوعا ما ... لكنك في البيت الثاني بديت تنزل في المستوى ...
وشو يخص الحمص والفول والزيتون ... وإلا تشبهم في الخلق اللي على قولتك زلمات ومصاروة ؟؟؟؟
ولما بتحكي يردون عليك ألو مين ومين دلك على هون ... ياخي كل إنسان وبتكلم بلهجته الأصلية وناكر أصله أظني ما فيه خير
والإنسان اللي بتحكي عنه راتبه عشرين ألف ... كم عددهم بالله عليك من بين الأربعة مليون ... وفي نظرك ما يستحق هالراتب على خبرته وشهاداته ؟؟؟
وغربته
إذا إنت ولد البلد وتغربت مثل ما تقول من راس الخيمة لين العين تصرف لك بدل غربة وإنت داخل بلدك ... ما تبى هذا ياخذ بدل غربته آلاف الكيلو مترات عن بلده ...
والحين إنت بلسانك يبت طاري دهان السير والواسطة ... شو فايدتها هالشهادة اللي عندك اللي تقول عنها وإنت ساير تشتغل بالواسطة ... على ما اعتقد إنت كنت من طلبة المنازل وإلا المسائي من اللي يدخلون المكتبات الصبح يوم الامتحان ويقول عندك مذكرات ... ويوم يرد عليك الهندي على قولتك أي مادة ؟ ... ترد عليه بكل برود والله ما أعرف هم اليوم أول ثانوي شو عندهم ... عاش طالب العلم وعقب ايي يرمس عن الشهادة
قبل لا تقول إنهم يدفنونك في السلع وإلا ما أدري وين ... دام إنك تقول إنك ولد البلاد وخايف عليها وتحبها ... أظني اللي يخاف على بلاده ويبى الستر ويشتغل صدق ما يسأل عن المنطقة دام إنه فيها خدمة لبلاده ... عادي أظني تروم تشل عيالك وياك وما فيها شي لو سكنت في السلع وإلا لازم يعني العاصمة ودائرة حكومية عسبة الشردة على كيف كيفك والسوالف والتعرف على البنات وغيره وغيره وغيره يقول المثل ... بلادي وإن جارت علي عزيزة ... وأهلي وإن بخلوا علي كرام
اللي يفهم هالمثل صح هذا نقدر نقول عنه مواطن ويحب بلده ...
واللي تقول عنه ياخذ بدلات وما أدري شو ... ليش هالمبالغة ... خاطري أشوفه هذا اللي ياخذ بدل معجون الأسنان ... تصدق بسير أداوم عنده علاقة ملابس
واللي تقول عنهم مدحت ونسرين وقوم بالحمص والفول والزيتون ... أكيد مردهم لبلادهم لأنهم معتزين فيها ويفتخرون فيها ... بس اللي تقول عنهم هالفئة يسبون ويلعنون هاذيلا يستاهلون الحرق لو كان مب مظلومين لأنهم يطعنون الإيد اللي مدت لهم الخير
وإذا إنت مب عنصري شو بقيت للعنصرين أبى أعرف ؟؟؟؟ !!!!
وفي سالفة الأقربون أولى ... أنا في هاي النقطة أتفق وياك مليون بالمية ... بس بشرط ... لو كان الأقربون صدق خايفين على بلدهم ويحبون يشتغلون بذمة وضمير ...
مب يوم تقوله تعال افتح مشروع تستفيد منه ... يرد عليك لا بعدني بتم أتريا سنة ... بسير بحط هالفلوس في الأسهم باخذ أرباح بسرعة ... تراها فلوس حرام والمال الحرام ما يدوم ... وأظني هالدليل واضح للجميع وشو يصير في الأسهم وغيرها ...
وفي سالفة دهان السير والخوف والواسطة ... رد الأخ السبوسي برد جوهري ... الله يصلح الحاشية ...
يعني يوم واحد عنده منصب وإلا معرفة ... سوى واسطة لولده وعينه رئيس قسم وولده ما يخصه في الدنيا مب بس الوظيفة بشي ... هذا شو تقوله ؟؟؟
وأكيد قوم بالحمص اللي طريتهم يخافون من رئيسهم اللي واسطة قوية وهو ولد البلاد وكلمة منه يقطع رزقته ^_*
وعندي لك سؤال ... مكتب أعمال شيخ بدون ذكر أسماء تدخل عليه تشوف الموظفين من المدير إلى الفراش مرورا بالمدير المالي والمدير الإداري والمحاسبين والمراقبين والسكرتاريا وافدين ما اسم واحد مواطن تحت مسمى المدير العام للمكتب ولا تشوفه إلا بالستة أشهر مرة ... ويوم يدخل المكتب يشرب قهوة وشاي ويطلع ويفر كل الأعمال للمدير الوافد ... ويا كثر هالعينات حتى في الدوائر الحكومية ...
وزمان أيام الجاهلية كانوا يقولون من علمني حرفا صرت له عبدا ... والعبودية محرمة في الإسلام ...
يعني الأيام هاي يقولون من علمني حرفا احترمته لو قليلا ...
يعني الله يرحمه الشيخ زايد يوم بنا دولة الامارات ياب هالوافدين اللي تقول عنهم ... ما يستحقون الاحترام منك لو قليلا مقابل ما قدومه للبلد هذا بلد الخير بلد زايد الخير ؟؟؟ وإلا يستحقون تقول عنهم حمص وفول وزيتون ؟؟؟
صح أنا وياك في منهم فئة يستاهلون الحرق ... ولكن في فئة منهم يستاهلون ينحطون على الراس لما قدموه ...
عيل شو رايك مثل ما إنت شبهتهم بشي مشهور في بلدهم يلا أنا بقولك طوي وإلا نخلة وإلا طماطة ... ترى هالأشياء مشهورة في بلدك يا ولد البلاد
جنك بترضى على نفسك هالشي إرضاه على غيرك
أخليك مع هالفقرة تفكر فيها على راحتك ...
والحين أرد عليك برد بثاني مع إني أظن الأولي هو اللي ينفعك أكثر ^_*
إذا كنت صادق بالكلام اللي قلته كله ... فهل لي بسؤال ... من ضمن المليون الي قلت عنهم المواطنين كم عددكم اللي من هالفئة ؟؟؟
100 ألف ؟؟؟ 200 ألف ؟؟؟ 750 ألف ؟؟؟ 990 ألف ؟؟؟
ذكرتني بنكتة سياسية ... وهي :
اجتمع بوش وبلير وعقب الاجتماع عقدوا مؤتمر صحفي وخلال المؤتمر سأل أحد الصحفين : ما هي آخر القرارات بخصوص العراق وأفغانستان وباقي البلاد ؟؟
فكان رد بلير : لقد قررنا ذبح 14 مليون مسلم ودكتور أسنان واحد ...
فكان الرد الصاعق من الصحفيين العرب المسلمين : وليش دكتور الأسنان ؟؟؟
وهذا حال العرب والمسلمين ... الاستهزاء ببعض مثل ما قلت حضرتك قوم بالحمص والفول وزيتون ...
ولو حطينا نقطة سودا في نص ثوب أبيض بتكون واضحة وملفتة للانتباه وبتتغطي على اللون الأبيض النظيف ...
ويوم ندخل دائرة حكومية ونتفاجأ باللي محنيا إيديها وميكياج تقول سايرة حفلة واللبس تقول عارضة أزياء ... ويوم تكلمها ترد عليك من طرف خشمها العوي ... شو بتكون نظرتك وتفكيرك ؟؟؟ وياريتهم وحده وإلا ثنتين وإلا ثلاث وإلا خمسين ألف حتى ... وايدين وايدين وايدين ...
وهذا هو حال المواطنين المحبين لبلدهم واللي حظهم ونصيبهم من خير بلدهم ضايع ... إلا من رحم ربي
هذا ردي عليك شيخي ... إنت كانت عندك حرية التعبير وبالغت فيها شوي ... وأنا عندي بعد حرية التعبير مثلك وبالغت فيها شويتين
السموحة على الإطالة ... والسموحة ثم السموحة على الرد ... ولكن مثل ما تسمع ترد ... وأتمنى من كل شخص يبى يعلق على ردي ... إنه يقراه بالكامل كلمة كلمة وبعدها يعلق عشان أقدر أرد عليه ...
الفراشة ...
تستاهلين التقييم على هالنقلة ... وتم التثبيت
مفتـ العين ـون ...
العرض العادي
