http://www.alamuae.com/alam/m-bor7imh/alam.ram




لا ردج الله لا ولا أطلب تردين .. ادعي عليج بعثرةٍ في صلاتي
عثرة تشلج ما بعدها تقومين .. يا للي نقضتي عهودنا الماضياتِي
كانت تروح الروح ساعة تروحين .. وتعاف نفسي شربها والمقاتي
كنتي مناة القلب والروح والعين .. واليوم عينج يعلها ماتباتي
كنت أحسبج للعهد و الحب توفين .. قلتي الغدر بالحب ما هو سواتي
و بان الغدر سمٍ جرى بالشرايين .. الله عسى يسقيج سم الفعاتي
كلي سقيتج حب و اليوم تنسين .. تقولين حلم أيام و اليوم فاتي
و خذتي الهوا لعبه على ما تحبين .. إلين عصفت بالهوا عاصفاتي
و صرتي بشعري فالعذارى تباهين .. تقولين أنا شمس العصر في حلاتي
وبالشعر صورتج خزام ورياحين .. واثرج هضاب وشوك مابه هداتي
و بالشعر غليتج على كل غالين .. و أثرج دنيَّه تتبعين الدناتي
رسمتج سحابة خير قطر تلفين .. فزت لج الصحرا زهور ونباتي
رسمتج مهاتٍ للجميلة تقودين .. و أثرج خروفٍ ضيعتها الرعاتي
توسلت لج على حب عامين .. عامين لكن في حسابي مئاتي
ناديت لكن لي أبد ما تسمعين .. عمري و روحي و الفكر في شتاتي
خنتي و بعتي كل عهد وأيامين .. ما عاد يفرق بين ماضي و آتي
و صرتي مثل غيرج برخصٍ تبيعين .. يا مرخصتنني مابقى لج غلاتي
تحسبين انج بالمهافات ترقين .. كيف الصعود يكون للهاوياتي
والنوق من تخرس فلا يفيد تمرين .. مايفيدها قلص وضرب العصاتي
ومع ناقة خرسا تكلفت سنتين .. فلا لانت بشده ولا بالهداتي
اسبوع فدوامِي و لا ايي غير يومين .. و يوم أوصل الدار أتصل و أحاتي
صبري نفذ و اليوم ثارت براكين .. مظلوم أنا و باجر تحل دعواتي
سمعي عسى من بعدها ما تسمعين .. سمعي دعاء من صار قلبه حصاتي
عساج عوقٍ منه ما عاد تبرين .. عوقٍ تشافق له قلوب العداتي
أدعي عسى من ناظرج ما تشوفين .. و تطحن بج الأيام طحن الرحاتي
يالله عسى يحتار فيج المداوين .. تبين الممات و لا يجيج المماتي
يالله عسى كف الندامة تعضين .. تندمين يوم انه يفوت الفواتي
وتبكين دم يسيل من مقلة العين .. ويحتار قلبج من عناج وتعاتي
و عسى ما تلاقين منه القلب تهدين .. و إن هو حصل أدعي عساج الشتاتي
يا بلوة اللي وسط بيته تعيشين .. غافي و حوله شب جمر الغضاتي
عسى بعمرج ساعة ما تهنين .. و تمضي حياتج بين هم و شقاتي
يا بنت قلبي وين مثله تلاقين .. قلبٍ عطاج الحب ما قال هاتي
ييتج وروحي شلتها لج بكفين .. وفي التاليه رمح الخيانه جزاتي
يالله عساج النار يا أم ويهين .. كلنا انكشفنا ما تفيد العباتي
يالله عسى تلبسج جن و شياطين .. و تكونين مدعاة الحكي و الشماتي
والله ماني منتظر قلبج يلين .. و المجبلات أكثر من الفايتاتي
وماعادتي اتبع طعون المقفين .. ريحٍ تشل طعونج المقفياتي
يا ليلةٍ ظلمة على الله تزولين .. و تأتى ليالي سعدنا مشرقاتي
ياحيةٍ رقطه تقود الثعابين .. باجر تحل ايامج المعتماتي
يا ظالمة نفسج ترا الدهر يومين .. يوم النجاة و يوم ما به نجاتي
بيني و بينج تحكم أيام و سنين .. و انا شاهدي قلبٍ من الغدر ماتي
لو كان عذرج في كفوف الموازين .. لكان رِبَح كل غدر البناتي
يا دمعة التمساح لالا تذرفين .. العيون رغم دموعها كاذباتي
لا ما عرفتي الحب لا ما تحسين .. وغدرج تعدى غدرذيب الفلاتي
الذيب يعوي قبل يغدر بمسكين .. و انتي غدرتي خافقي في سباتي
وانتِ السبب سقتِ على القلب جرحين .. غدر الغرام و وجع الذكرياتي
وانتي السبب واليوم لا لا تلومين .. و ان ياج باجر شوفي شلون ياتي
والله لكتب و أفضحج في دواوين .. و أرزف وأغني يوم خبر الوفاتي
و أرسم لأهل العشق قلب و سهمين .. و قصة خيانة ما روتها الرواتي
و يمين لنشر فوق إسمج عناوين .. و أشهرج من قاصي اليمن للفراتي
و من غرب هالدنيا إلى قاصي الصين .. ديوان غدر فيه كل اللغاتي
و البادي أظلم سنة العين بالعين .. و لاَّ فهذي لا عادتي ولا صفاتي
و يا شبه انسانه براسِ و رجلين .. أعوذ بالرحمن منج في صلاتي

مـــــــــــــــــــــــحمد بن علي بورحيمه