اسير الحزن

عفا الله عن خطا غدر الخناجر والضلوع ابطال
باسامح واتركك تحت الظلام الحالك .. الحالك

دخيلك وفر دموعك ترى هدر الدموع اذلال
وترى مافيه احد يصبر مثل صبري بغربالك

انا عيب على انقض كلامي ,والرجال افعال
واذا قلت اقطع حبالك ..تراني بقطع حبالك

عشان اكسب هدب عينك تجرعت العذاب اشكال
وليتك ترأف بحالي عشان ارأف بحالك

مسوي في حياتي شي .. مايذكر ولا ينقال
حتى العدو وهو العدو .. مايعمل اعمالك

تمسيني على الهم وتصبحني على الغربال
تقلطني فناجينك .. وتقصر عني دلالك !!

تحملت التعب لاجلك وانا حملي يهد جبال
رحلت من العذاب .. وماوقفت الا على جالك

علامك كلما أجيك متواضع جيتني تختــال
معاك الي متى باصبر .. وصبري معك يحلى لك

مثل ما اقبلت لعيونك لزوم اتلدلي باقبــــال
ومثل ماقد حشمتك , حس واحشم قلبي اشوالك

انا محدن بجابرني اساير معك هالمنوال
ترى ماني تبيع لك .. ولاني اصغر عيالك

انا جيت اعشقك : نبض ومشاعر , مااعشقك تمثال
انا جيت اسكنك واحياك وابقى فيك , وابقى لك

انا جيت بظما عاشق تعب يطرد سراب اللال
انا جيت استفز رضاك ..من فرقاك والجالك

انا ماهمت بك عاقل انا كنت اعشقك بخبال
انا ماكنت احبك حي .. انا كنت اعشقك ..هالك

تخيل من كثر ماخفت تلقى للزعل مدخال
اخاف اخطي على طيفك وادوس برجلي ظلالك

تبعتك .. والعرب تتبع رعود البارق الهمال
وانا شفت المطر .. يتبعك في حلك وترحالك

كأن اللي خلق حسنك خلقني مع جسدك ظلال
وصرت اقرب جسد يمشي معك بقفاك واقبالك

ابي قلبك يحس انه فقد .. بمحبته رجــــال
ملكته من هدب عين .. وخسرت ارضاه باهمالك

صحيح ان الفراق اقسى ولكن الوصل إمحال
وانا صعب على ارضي غرورك .. واضعف إقبالك

بعد ماحققت عيني فبعدك للرقاد امال
اعود للسهر ؟ ياخوي فال الله ولا فالك

ببدل نظرتك فيني .. واجي لك كل يوم بحال
باكون اقرب من ثيابك عليك .. ولا اتهيالك

بالمك ,وانثرك ,واجمعك ,وارجع انثرك باهمال
باخونك ,وازعلك, وارضيك ,وازعل منك وارضى لك

ابرسم بالثرى وجهك .. وابدفن صورتك برمال
ابشكي للعرب فرقاك .. واضحك عند عذالك

ابهديك الوصال :فراق .. واهديك الفراق وصال !
بسوي مثل ماشوفك تسوي ..وافعل افعالك

عشان نعرف من فينا الزعول .. ومن وسيع البال
ابيك تذوق فنجاني .. وانا بذوق فنجانك

نصيحة احتفظ فيها قصر معك .. الزمن أوطال
ابي تسمع كلامي زين .. وتحطه عـــلى بالك ..

اذا حبك اهبال أطفال .. لك عندي هبال أطفال
ولا .. وابشر بعد بهبال حب ماهو بهـــبالك

اذا قصدك تهين اســـمي عشان تشمت العذال
ترى لا انته ولا غيرك .. ولا عشره من اشكالك

__________________
بغيت اسمع بغيت اضحك لكن للأسف مجروح

هذا حقي هذا حلمي لكن للأسف ممنوع

وش اسوي ياعرب لأجل اصبح مسموح

دنيتي تغيرت من يوم تركت النووووح








أســــــــــ الحــــزن ــــير