صباح الخير يا طير ن تأصّل من شياهينه =صباح المسك ودهن العود لمعتّق بها لونه
صباحك هيل وريح البن لي فايح فناجينه =صباح السعد يا وجه السعد بريح الورد فمتونه
هلا باللي غلا قلبه توضّح من عناوينه =حبيبٍ غاليٍ عندي أشوف الحب فعيونه
اخط الشعر لعيونه وارسخها بنياشينه =وارتبها واظهرها من الخافق بمضمونه
كتبت الشعر في وصفك ولعيونك منقّينه =و أبياته تعبّر عن شعور القلب ومكنونه
يا زين الشعر لي ياني ثمر باهي فبساتينه =خيالي له عيوني له وروحي لعينه مرهونه
احبّه حب ما يوصف قلب قلبي وموازينه =سكن روحي .. سلب عقلي .. بحبه صرت مفتونه
انا والشعر تخاوينا فدروبه وفي ميادينه =واسوقه لكم بامثاله حروفه دوم موزونه
سلامي لها مثل عطرٍ سكب منه رياحينه =وباعداد البروق وما نزل غيثن من مزونه
أبرسل بوسه لخلّي تلامس عالي جبينه =و أرسل له ورود الشوق ما ترسل لَحَد دونه
وأرسل له (رسالة حب) تلمس راحت ايدينه =ترا والله يستاهل .. وكل الخلق يفدونه
اذا كان الخيال يشرد ويبحر في دواوينه =فلج ابحر بحور ٍ ما يطولها انس بركونه
عيونج لي تذوبني وجرحي بج تداوينه = ترا جرحي عجز طب البشر لا ما يداونه
احب اسمك احب رسمك وكل شي فيك مغلينه =ولك عندي مكانه عاليه فالقلب مصيونه
حروفه بالوتر ايقاع عذوبه في تلاحينه = ابا كل البشر تطرب وابا منهم يغنونه
ألا يا منبع الطيبه ترا ودّك مدارينه =فوسط العين حطّيته و أهدابي يدارونه
ولو يعطوني العالم مع كنوزه وملايينه =محال ارضى بحد غيرك وسط روحي يحطونه
ولو دار الزمن ولا تغيّر شي فسنينه =بيبقى الغالي السامي وغيره ما يساوونه
انا وياك في الدنيا وللعالم براهينه =تبرهن لك في خافي القلب دستوره وقانونه
انا مجنون بهذا الحب وكم في الحب مجانينه =انا مجنون حبّه وقبلي ليلى قيس مجنونه
تحيرت بالوصف رمان مشمش باهين تينه =ابا القى حلاوتها لقيت الفاكهه دونه
من الطيبه ومن الاخلاق والامجاد تكوينه =فخر وسنادٍ ونخوه لكل اللي يخاوونه
اصيلٍ والنعم باصله تفرّد في معادينه =جميع الناس تشهد له بكل الخير يطرونه
غلاه بخافقي واضح فلا يحتاج تبيينه =تراه حبي على وجهي جميع الخلق يقرونه
انا اهواك في الماضي وانا اهواج ذالحينه =ودرب الحب غيري يعجزون ولا بيمشونه
وانا امشيه لج حتى اذا شايك مجارينه =ولو وداني لبكين وموسكو وحتى لشبونه
يا دمٍ جاريٍ فيني ويسري في شرايينه =يا جوهر باهيٍ الماس عجزوا ما بيشرونه
جمالك يا بعد عمري جمال ٍحلو يا زينه =وصوفه غايه فالروعه ويبهر لي يشوفونه
يذوبني بأوصافه.. تشوّقني تلاحينه =يودّيني إلى عالم خيالي زاهي بلونه
واشوف إني انا وياك نحنا بس الاثنينه =تبادلنا غرامٍ غيرنا لا ما يعرفونه
يعل ربي يحميها من عيون ومن شياطينه =وتبقى نجمةٍ وسط الليالي ساطعه فكونه
الشاعر : الخيال الشارد